Guddoonka labada Aqal oo kulan la qaatay ATMIS & Booliska Soomaaliya ku aadan sugida aminga doorashada xilli Bandow lagu soo rogey Muqdisho

Muqdisho (WDN)- Guddoomiyaha golaha shacabka Sheekh Aadan Maxamed Nuur (Madoobe) iyo guddoomiyaha Aqalka Sare Cabdi Xaashi Cabdullaahi ayaa maanta kulan la qaatey saraakiisha hawlgalka ATMIS iyo ciidamada Soomaaliyeed, waxayna kula dardaarmeen sidii ay isaga kaashan lahaayeen sugidda amniga doorashada dhici doonta maalinta berri ah 15-ka May oo saacado kooban ka harsantahay.

Labada guddoomiye oo kulanka la qaatay taliyaha guud ee Sector1 hawlgalka ATMIS Gen. William Shume iyo taliyaha ciidamada Booliska Soomaaliyeed Gen. Cabdi Xasan Maxamed (Xijaar) iyo saraakiil kale. Waxaana kulanka goobjoog ka ahaa ku xigeenka ergeyga gaarka ah ee midowga Africa Fiona Lortan.

Gguddoonka Baarlamaanka ayaa ka dhagaystey warbixin saraakiisha ATMIS halka ay mareyso u diyaargarowga laamaha amniga ee doorashada madaxweynaha Soomaaliya oo maalinta berri dhici doonta.

Guddoonka labada aqal ayaa farey saraakiisha ATMIS iyo kuwo Soomaalida in ay iskaashi buuxa ka sameeyaan sugidda amniga doorashada xilweynna ay iska saaraan.

Dhanka kale taliska Booliska Soomaaliya ayaa kusoo rogey magaalada caasimadda ah ee Muqdisho bandow adag oo bilaabaya 14-ka May oo caawa ah gaar ahaan 9:00 Fiidnimo kuna eeg 16-May saacaddu marka ay tahay 6:00 subaxnimo.

Waxaana bulshada la farey in ay u hogaansamaan awaamiirta laamaha amniga .

Inta bandowgu socdu ma jirto wax gaadiid ah oo dhaqaaqi kara oo aan ka aheyn gaadiidka ciidamada loo xilsaarey sugidda amniga doorashada.

Maxamed Cumar Aaden.
Wardheernews, Muqdisho

We welcome the submission of all articles for possible publication on WardheerNews.com. WardheerNews will only consider articles sent exclusively. Please email your article today . Opinions expressed in this article are those of the author and do not necessarily reflect the views of WardheerNews.

WardheerNew’s tolerance platform is engaging with diversity of opinion, political ideology and self-expression. Tolerance is a necessary ingredient for creativity and civility.Tolerance fuels tenacity and audacity.

WardheerNews waxay tixgelin gaara siinaysaa maqaaladaha sida gaarka ah loogu soo diro ee aan lagu daabicin goobo kale. Maqaalkani wuxuu ka turjumayaa aragtida Qoraaga loomana fasiran karo tan WardheerNews.