Muqdisho (WDN)- Gudoomiyaha Gobolka Banaadir ahna duqa magaalada Muqdisho Yuusuf Xuseen Madaale, ayaa maanta dul dhigey gacacsatada caasimadda amar culus in aysan u hogaansamin awaamiirta uga imanaysa kooxda Alshabaab oo saamayn ballaaran ku leh koonfurta Soomaaliya.

Md. Madaale ayaa amrey in dib aan loo furi doonin albaabka gacansi ee lagu xiro amar kasoo baxey maleeshiyaadka Alshabaab, waxa uuna yiri mar uu warbaahinta Muqdisho maanta la hadlay ” albaabkii ganacsi ee lagu xiro amarka Alshabaab dib looma furi doono, sidoo kale dadka garsoorka u raadsada Muqdisho kuma soo noqon doonaan”

Hadalka Duqa Muqdisho ayaa noqonaya culeys hor leh oo kusoo kordha ganacsatada oo hore uga cabanayey handadaada iyo awaamiirta adag ee ay kala kulmaan maleeshiyaadka Alshabaab, oo lacago ka qaada ganacsadihii diidana uu wajahayo dhibaatooyin kala duwan oo isugu jira burburinta ganacsiga ,xarig ama dil.

Illaa iyo hadda ma jiro wax jawaab ah oo ka yimid midowga ganacsatada gobolka Banaadir, lamana oga qaabka uu u fuli doono amarkaan cusub ee kasoo baxay gudoomiyaha gobolka Banaadir Yuusuf Xuseen.

Maxamed Cumar

WardheerNews, Muqdisho