Muqdisho (WDN)- Siyaasiyiin muddo ku dhow sannad diiddanaa doorashooyin hal dhinac ah ayaa hambalyo u diray hoggaanka cusub ee Hirshabeelle, kadib doorashadii muranka dhalisay ee Jowhar. Tallaabadan ayaa soo celisay su’aalo ku saabsan mowqifka dhabta ah ee mucaaradka, iyadoo sidoo kale dhacdadii Galmudug ay muujisay mabda’ ta mucaaradaka. , Galmudug oo siyaasiyiin mucaarad ahi ay hambalyeeyeen doorashadii halka dhinac aheyd, ee uu Madaxweyne Xasan Sheekh Maxamuud abaabulay.
Doorashada ayaa mar kale uu noqday madaxweyne Cali Cabdullaahi Xuseen (Guudlaawe), halka Cabdifitaax Xasan Afrax uu noqday madaxweyne ku-xigeen. Hase yeeshee, natiijada oo hore loo sii saadaaliyey ayaa dhalisay su’aalo ku saabsan in doorashadu aanay aheyn tartan dhab, balse ahyed qorshe hoggaanka Villa Soomaaliya horey u wadey .
Cabdulqaadir Osoble, oo lala xiriiriyo isbahaysiga mucaaradka ee Salvation Forum, iyo Maxamed Abukar Islow, wasiirkii hore ee amniga gudaha oo xiriir la leh isbahaysiga Haybad Qaran, ayaa Guudlaawe hambalyeeyey, iyagoo ku boorriyey inuu xoojiyo midnimada, dib-u-heshiisiinta iyo horumarka Hirshabeelle.
Dhanka kale, hambalyada Ra’iisul Wasaarihii hore ee Soomaaliya, Cali Maxamed Geeddi, oo aan qeyb ka hayen mucaaradka ka dhanka ah habka doorashooyinka Madaxweyne Xasan Sheekh u wado, ayaa hambalyeeeyay, taasi oo aheyd mid la filayay.
Mucaaradka oo ay la soo daristay su’aallo ku aadna mabado’ooda dhabta ah
Muranku ma aha in siyaasiyiintu hambalyeeyaan hoggaamiyeyaal la doortay. Su’aasha muhiimka ahi waa sababta siyaasiyiin muddo dheer ku dooddayey in doorashooyinku sharciyad siyaasaddeed ka maqan tahay, ay hadda u hambalyeynayaan natiijadooda, iyaga oo aan sharraxin in tabashooyinkoodii la xalliyey oo heshiis la gaadhay.
Tani kaligeed ma caddaynayso in siyaasiyiintaasi ka tanaasuleen mucaaradnimadooda ama ay si qarsoodi ah ula shaqaynayeen dowladda federaalka. Hase yeeshee, haddii mowqifkoodu isbeddelay, waxaa habboon inay bulshada u caddeeyaan waxa isbeddelay iyo sababta.
Arrintani waxay ka tarjumaysaa walaac ka ballaaran Jowhar, kaas oo hore uga muuqday Galmudug iyo murannada ku saabsan heshiiska siyaasaddeed, federaalka iyo hannaanka doorashooyinka Soomaaliya. Taasi oo tusaysa in mucaaradku laheyn qorshe ku dhisan mabda’ ( principle) isbedel- doon ah, oo dalka lagaga sarayo dhibaatooyinka iyo hoggaan xumada ka jirta.
Mabda’ mise dano siyaasaddeed?
Kalsoonida mucaaradku kuma dhisna oo keliya dhaliilaha uu u jeediyo dowladda, balse waxay ku xiran tahay inuu si joogto ah ugu dhaqmo mabaadi’da uu difaacayo. Mucaaradnimadu ma noqon karto loollan ku kooban dano shaqsiyeed, isbahaysiyo isbeddelaya iyo tartan xilal in la helo ay ka dambeyso.
Siyaasiyiin bilo badan ku muransanaa sharciyadda doorashooyinka oo haddana natiijadooda hambalyeeya iyaga oo aan wax sharraxaad ah bixin, waxay halis ugu jiraan inay dhaawacaan doodda ay muddada dheer difaacayeen
Siadaa darted mucaaradka Soomaaliya wuxuu wajahayaa inuu bulshada u sharraxo sababta uu mowqifkiisa u beddelay, ama uu sii wiiqo kalsoonida dadweynaha ee ku aadan mabda’a iyo daacadnimada siyaasiyiintiisa.
Dowladda federaalka waxaa la gudboon in ay khilaafka doorashooyinka ku xallisaa wadahadal hufan iyo heshiis siyaasaddeed oo loo dhan yahay, halkii ay hambalyada siyaasiyiin gaar ah uga dhigan lahayd beddelka is-afgarad qaran.
WardheerNews