Muqdisho (WDN)- Madaxweynaha Jamhuuriyadda Federaalka Soomaaliya Md. Xasan Sheekh Maxamuud ayaa qirey in laga helay cudurka Covid 19 markii uu dib ugu soo laabtey magaalada caasimadda ee Muqdisho, oo baaritaano lagu sameeyay.

Madaxweyne Xasan ayaa sheegay in xaaladiisa caafimaad ay dagantahay, isla markaana uu gudanayo waajibaadkiisa shaqo, isagoo raacaya hab raaca caafimaadka ee la xariira xanuunka Covid 19.

“Waxaan dhammaan shacabka Soomaaliyeed ee sharafta leh la wadaaggayaa in baaritaanno la igu sameeyay maanta lagu xaqiijiyay in la iga helay COVID-19. Intaas waxaa dheer, inaan caafimaad qabo oo aan sii wadi doono shaqada aan u hayo qaranka iyo umadda Soomaaliyeed aniga oo raacaya habraacyada caafimaad ee la xariira Covid-19” ayuu ku yiri qoraal kooban uu soo saarey madaxweynaha Soomaaliya mudane Xasan Sheekh Maxamuud.

Hadalka madaxweynaha ee ku aadan in laga helay xanuunka Covid 19 ayaa waxa uu xaqiijinayaa wararka tilmaamayey in sababta keentey in booqashadii uu ku tagey dalka isu taga Imaaraatka Carabta ay dheeraatay, taasi oo qaadatey maalmo badan waxaana arinkaasi lagu macneeyey kadib markii la sheegay in xanuunka Covid 19 laga helay qaar ka mid ah wafdiga madaxweynaha.

Safarka Madaxweynaha ee Isutaga Imaaraadka Carabta, ayaa ahaa safarkii kowaad ee uu dalka dibada uga baxo tan iyo intii uu xukunka la wareegay. Safarkaasi oo ujeedadiisu aheyd sidii dib loogau soo celin laaa xidhiidhka labada wadan ee Soomaaliya iyo Imaaraadka, oo aad u xmuuday intii Madaxweynii hore Farmaajo dalka hoggaanka u hayay.

Maxamed Cumar Aadan
WardheerNews, Muqdisho