Friday, March 29, 2024
Wardheer News
  • Slideshow
  • Warar

Axmed Shide oo Loo Magacaabay Wasiirka Maaliyadda Itoobiya

Axmed Shide

Guddoomiyaha XDSHS, islamarkaana ahaa Afhayeenka Xukuumadda Federaalka Itoobiya Md Axmed Shide ayaa loogu magacaabay Wasiirka Maaliyadda ee Itoobiya isku-shaandhayn uu maanta ku sameeyayay Ra’iisalwasaare Abiy Axmed golaha xukuumaddiisa.

Abiy Axmed ayaa golaha Xukuumaddiisa ku soo koobay 20 wasiir halkii ay hore uga ahayd 28 wasiir iyadoo kala badh wasiirradan cusubi ay yihii haween, kuwaasoo loo magacaabay wasaarado muhiim ah oo ay ku jirto wasaaradda gaashaandhiggu.

Wararku waxay intaa ku darayaan in la abuuray wasaarad cusub oo lagu magacaabo wasaaradda nabadda (Peace Ministry) si wax looga qabto iskudhacyada qawmiyadaha kala duwan ee ku nool dalka Itoobiya oo sii labakacleeyay tan iyo intii uu hoggaanka dalkaas la wareegay Abiy Axmed.

Md. Axmed Shide ayaa isagu muddo dheer ku soo dhexjiray siyaasadda deegaanka Soomaalida, islamarkaana ahaa shakhsi ay aad isugu dhawaayeen madaxweynihii hore ee deegaanka Soomaalida ka baarqabayn jiray oo haatan xabsiga magaalada Addis Ababa ku jira.

Axmed shide oo xilligan ahaa mas’uulka ugu awoodda badan Deegaanka Soomaalida ayaa u magacaabista xilka wasiirka Maaaliyadda dawladda Itoobiya muujinaysaa kalsoonida weyn ee uu Abiy Axmed ku qabo, iyadoo dhawaan la filayo hirgelinta qorsheyaal lagu furfurayo dhaqaalaha dalka Itoobiya oo uu ra’iisalwasaaruhu hore ugu dhawaaqay, gaar ahaan in qaybta dhaqaalaha gaarka ahi ku lugyeelato hay’adaha Isgaarsiinta iyo gaadiidka cirka oo iyagu gacanta dawladda ku jira.

Axmed Shide ayaa wuxuu beddelayaa Abraham Tekeste oo isagu xilkaas hore u hayay.

WardheerNews

 


We welcome the submission of all articles for possible publication on WardheerNews.com. WardheerNews will only consider articles sent exclusively. Please email your article today . Opinions expressed in this article are those of the author and do not necessarily reflect the views of WardheerNews.

WardheerNew’s tolerance platform is engaging with diversity of opinion, political ideology and self-expression. Tolerance is a necessary ingredient for creativity and civility.Tolerance fuels tenacity and audacity.

WardheerNews waxay tixgelin gaara siinaysaa maqaaladaha sida gaarka ah loogu soo diro ee aan lagu daabicin goobo kale. Maqaalkani wuxuu ka turjumayaa aragtida Qoraaga loomana fasiran karo tan WardheerNews.

Copyright © 2024 WardheerNews, All rights reserved

Leave a Reply

You must be logged in to post a comment.