Abwaan Jaamac Kadiye Cilmi oo maalintii shalay ku geeriyooday duqaymo la sheegay in ciidamada Somaliland ka geysteen magaalada Laas Caanood, ayaa maanta lagu aasay magaalada Gambadhe ee gobolka Sool.

Abwaanka oo ka mid ahaa halabuurka Soomaalida siiba dhinaca gabayga ragga ugu caansan xilligan ayaa waxa uu tiriyay gabayo iyo geeraaro tira badan oo ka hadlaya dhinacyada kala duwan ee nolosha iyo guud ahaanba marxaladihii kala duwanaa ee ay soo martay Soomaalidu.

Abwaan Jaamac Kadiye (AHUN) murtida iyo hogatusaalaha ay xambaarsanyihiin gabayadiisu ka sokow, waxa uu lahaa luuq macaan oo soo jiidanaysa dhegeystaha marka uu ku luuqaynayo gabayada iyadoo uu ummadda Soomaaliyeedna uga tagay dhaxal suugaaneed qiimo leh oo ay u aayi doonaan.

Waxaa arrin lagu farxo ah in guud ahaanba suugaantii kala geddisnayd ee Abwaan jaamc Kadiye (AHUN) lagu soo ururiyay buug kaasi oo la sheegay in dhawaan bulshada loo soo bandhigi doono.

Aaska abwaanka ayaa waxaa ka soo qaybgalay dadweyne aad u tiro badan, kuwaas oo isugu jiray isimada iyo hoggaanka cusub ee SSC, mas’uuliyiin iyo shacab ka kala yimid meelo kal geddisan.

Haddii aanu nahay bahda WardheerNews waxaanu marxuumka Alle uga baryaynaa in uu ka waraabiya naxariistii janno, qoyskii, qaraabadii, asxaabtiisii iyo guud ahaanba ummadda Soomaaliyeedna samir iyo iimaan ka siiyo. Aamiin.

WardheerNews