Muqdisho (WDN) — Qoys Soomaaliyeed ayaa waxaa soo wajahday musiibo murugo leh kaddib markii lagu sheegay inay ku sumoobeen hilib iyo dhuux geel oo laga keenay magaaalada Ceeldheer ee Gobolka Galgaduud, taas oo sababtay geerida laba carruur ah, halka saddex kalena ay hadda ku jiraan isbitaalka.

Qoyska ayaa Khamiistii u soo qaaday caruurta Muqdisho kadib markii ay ku sumoobeen cuntada. Sida xogta WardheerNews ay heshay, laba ka mid ah qoyska ayaa geeriyooday, iyada oo midkood uu ku dhintay Ceeldheer ka hor inta aan Muqdisho loo soo gudbin.

Saddexda carruur ah ee hadda lagu daweynayo Isbitaalka Dr. Dufle ee Muqdisho. Aabbahood, Xirsi Cusmaan Cumar, ayaa sheegay in qoysku ku noolaa tuulo ku dhow Ceeldheer, isla markaana carruurtiisu ay xanuunsadeen kaddib markii ay cuneen hilib iyo dhuux geel oo muddo meel yaallay.

Markii xaaladdoodu kasii dartay, ayuu sheegay in qoyska loo sheegay in aan Ceeldheer laga heli karin daryeel caafimaad oo ku filan, sidaas darteedna Muqdisho loo qaado. Saddexda carruurta ah ayaa ugu dambeyn la geeyay Isbitaalka Dr. Dufle, halkaas oo xaaladdooda si dhow loola socdo.

Dr. Cusmaan Dufle ayaa sheegay in carruurtu muujiyeen calaamado caafimaad oo aad u daran oo la jaanqaadi kara sumow. Waxa uu xusay in indhahoodu isu beddeleen cagaar, kaadidooduna ay guduudatay, iyadoo mid ka mid ah carruurta lagu arkay barar ku yimid beerka.

“Indhihii ayaa cagaartay, beerkiina wuu bararay. Lix maalmood gudahood ayay laba qof ku dhinteen. Baaritaankii cagaarshowga aan sameynay waxba kama soo bixin. Markii aan waalidka wareysannayna waxay noo sheegeen in carruurta la siiyay cuntadaas laga shakiyay inay sumeysan tahay,” ayuu yiri Dr. Dufle.

Dhacdadan ayaa qoyska ku reebtay murugo weyn, iyadoo laba carruur ah ay noloshooda ku waayeen, halka saddex kale ay weli ku jiraan xaalad u baahan daryeel iyo kormeer caafimaad.

Dhacdadu waxay sidoo kale oo tusaysaa adeeg iyo daryeel la’aanta shacbiga ee dhinaca dowladda, iyo khatarta ka dhalan karta hilib ama waxyaabo xoolaad oo si aan habboonayn loo kaydiyo ama muddo dheer meel yaalla, gaar ahaan deegaannada miyiga ah ee ay adag tahay in si degdeg ah loo helo adeegyo caafimaad iyo baaritaanno lagu ogaan karo sababta xanuunka.

Qoyska, se, tani ma aha oo keliya dhacdo caafimaad—waa masiibo qoys oo qalbiga taabatay: laba carruur ah ayaa geeriyooday, saddex kalena waxay weli ku jiraan gacanta dhakhaatiirta, iyadoo cunto loogu talagalay inay qoyska quudiso ay isu beddeshay sababta murugada iyo khasaaraha aan la qiyaasi karin.

WardheerNews