Addis Ababa (WDN) – Hawlgalka Taageerada iyo Xasilinta Midowga Afrika ee Soomaaliya (AUSSOM) ayaa si rasmi ah u bilaabay diyaarinta qorshaha lagu wareejinayo mas’uuliyadda amniga ciidamada Soomaaliyeed, taas oo calaamad u ah wejiga ugu dambeeya ee hawlgal muddo ku dhow labaatan sano laf-dhabar u ahaa amniga Soomaaliya.

Qorshahan ayaa saldhig u ahaa kulan ka dhacay magaalada Addis Ababa, kaas oo dhex maray Madaxa Hawlgalka AUSSOM, Danjire El Hadji Ibrahima Diene, iyo Guddoomiyaha Guddiga Midowga Afrika, Maxamuud Cali Yuusuf, iyagoo ka wada hadlay istaraatiijiyadda bixitaanka AUSSOM iyo sida Soomaaliya uga diyaarsan tahay inay si buuxda ula wareegto amniga dalka.

Sida ilo xog-ogaal ahi sheegeen, Danjire Diene ayaa qiray in go’aannadii ugu dambeeyay ee Mareykanka ee la xiriiray taageerada hawlgalka ay caqabado hor leh ku abuureen AUSSOM, taasoo sii xoojisay baahida loo qabo in ciidamada ammaanka Soomaaliya ay si degdeg ah ula wareegaan masuuliyadda amniga ka hor dhammaadka sanadkan, marka uu dhacayo muddo-xileedka hawlgalka.

Wareejintan ayaa loo arkaa mid ka mid ah isbeddellada ugu waaweyn ee soo mara taariikhda amniga Soomaaliya. Tan iyo markii la aas-aasay AMISOM, ka dibna loo beddelay AUSSOM, ciidamada Midowga Afrika waxay door muhiim ah ka ciyaareen dagaalka lagula jiro Al-Shabaab, difaaca hay’adaha dowladda, iyo dib-u-dhiska ciidamada ammaanka Soomaaliyeed.

Inkasta oo beesha caalamku sannado badan maalgelin iyo tababar ku bixisay ciidamada Soomaaliyeed, haddana waxaa weli taagan walaac xooggan oo ku saabsan in ciidamada qaranku ay si buuxda u buuxin karaan kaalinta ay banayn doonaan kumannaan askari oo AUSSOM ah marka ay dalka ka baxaan.

Arrimahaasi ayaa la filayaa inay si weyn uga dhex muuqdaan shir heer sare ah oo toddobaadka soo socda ka furmi doona magaalada Kampala, Uganda, kaas oo ay ka qayb geli doonaan Qaramada Midoobay, Midowga Afrika, dowladaha ciidamada ku leh Soomaaliya iyo Dowladda Federaalka Soomaaliya.

Shirka Kampala ayaa lagu wadaa in lagu gaaro go’aanno kama dambeys ah oo ku saabsan mustaqbalka hawlgalka, jadwalka bixitaanka ciidamada, wareejinta masuuliyadda amniga, iyo nooca taageero ee caalamku sii siin doono Soomaaliya marka uu dhammaado waajibaadka AUSSOM.

La-tashiyo diblomaasiyaddeed ayaa durba socda, iyadoo dhinacyada ay khusayso ay isku dayayaan inay gaaraan is-afgarad ku saabsan sida ugu habboon ee loo maareyn karo marxaladdan kala-guurka ah.

Go’aannada ka soo baxa Kampala ayaa la rumeysan yahay inay si weyn u qaabeyn doonaan mustaqbalka amniga Soomaaliya, iyadoo la isku miisaamayo khatarta ka dhalan karta dhammaadka mid ka mid ah hawlgalladii nabad-ilaalinta ugu dheeraa ee Afrika iyo baahida sii kordheysa ee ah in Soomaaliya ay si buuxda ula wareegto mas’uuliyadda amniga dalkeeda.

Soomaaliya, natiijada shirkan waxay noqon kartaa mid go’aamisa jihada mustaqbalka—ma aha oo keliya dagaalka lagula jiro Al-Shabaab, balse sidoo kale dadaallada lagu xoojinayo dowladnimada iyo hay’addaha qaranka kadib labaatan sano oo taageero ciidan iyo mid amni oo caalami ah.

WardheerNews